JAI GARBIEN ALDE KANPAINA: GORDEXOLAKO AZOKA

Abenduaren 1ean, Gordexolako San Andres eta Sortzez Garbia Azokan egon ginen Jai Garbien Alde kanpainaren markoan azoka aztertzen. Nekazaritza, abeltzaintza eta artisautza azokaren XXXI. edizioa izan da aurtengoa.

Helburu nagusiak bi ziren, alde batetik, hondakinen kudeaketaren inguruan azokan parte hartzen duten pertsonen iritziak eta pertzepzioak ezagutzea, eta beste aldetik, behatzaile gisa lan egitea.

Bertaratutakoen iritzia ondo aztertzeko produktu ezberdinak saltzen zituzten saltzaileei, artisauei eta bertaratutako pertsonei galdetegiak egin genizkien. Guztira, 14 saltokiri egin genizkien galderak eta azokara bertaratu ziren 7 pertsonari. Galdera-sorten bidez, azokan egiten den hondakinen kudeaketaren inguruko premiei buruz hausnartzen lagundu dugu.

Gordexolako Azoka adibide ona izan da nekazaritza eta abeltzaintzako azokek hondakinak kudeatzeko sistema on bat behar dutela erakusteko. Ekitaldiaren tipologia dela eta, hondakin arruntak biltzeaz gain (ontzi arinak edo beirazko botilak, adibidez), hondakin organiko, animalien hondakin, olio eta kartoizko kaxa ugari sortzen direla ere ikusi da. Azokan sortzen diren hondakinik ugarienak ontzi arinak eta beira izan dira. Postu gehienek ez dute hondakin askorik sortzen, saltzen diren produktu asko ontziratuta baitaude. Hondakin gehien sortzen dituzten postuak frutak eta barazkiak saltzen dituztenak dira, eta organikoa botatzeko edukiontzi handiak hurbil izatea gustatuko litzaiekeela esan digute.

Gordexolan, azokaren ondoren, hondakinak biltzen diren guneak identifikatu ditugu udal-zakarrontzietatik gertu (ez direla nahikoak ikusi dugu). Ikusi da paperontzietatik gertu mota guztietako hondakinak pilatzen direla. Txosna eta tabernen ondoan ere berdin gertatzen da.

Gordexolako Udalarekin harremanetan gaude datozen edizioei begira azokan hondakinen kudeaketa hobetzeko.

Guztion artean elkarlanean arituta #jaigarbienalde egiten badugu, hondakinak murriztea lortuko dugu! Zure herrian ekintzaren bat egitea nahi baduzu edo iradokizun edo ideiarik baduzu, idatz iezaguzu: kaixo@sareberdeak.eus